Ngubek Empang sampai Bawa Rantang: Ini Dia Tradisi Lebaran Khas Depok
PDMDEPOK.COM – Kalo ngomongin Lebaran di Depok, bukan cuma soal hari raya aje, tapi soal rasa, kenangan, ama kebersamaan yang dari dulu kagak ilang-ilang. Warga Depok mah punya cara sendiri buat nyambut Idul Fitri. Riweuhnya dapet, capeknya dapet, tapi bahagianya juga bejibun.
Biasanya, beberapa hari jelang lebaran, warga udah mulai sibuk dari pagi sampe sore. Salah satu yang paling ditunggu tuh ngubek empang. Ini bukan sekadar nangkep ikan, tapi udah jadi tradisi turun-temurun. Pada nyemplung rame-rame, anak kecil sampe orang tua, nyari ikan gurame, tawes, lele—apa aja yang bisa ditangkep. Air empang yang keruh, teriakan orang-orang, sama tawa yang pecah di mana-mana, bikin suasana jadi hidup. Ikan hasil tangkapan itu nanti buat hidangan lebaran. Rasanya beda, ada rasa usaha bareng di situ.
Abis dari empang, urusan rumah juga kagak kalah penting. Warga pada ngapur rumah—ngecat ulang biar keliatan bersih, terang, dan asri. Tembok yang tadinya kusam jadi kinclong lagi. Halaman disapu, dirapihin, pokoknya rumah disiapin buat nyambut tamu. Karena bagi orang Depok, lebaran bukan cuma soal keluarga inti, tapi juga silaturahmi yang luas.
Terus, emak-emak mulai nyuci perabotan. Piring, gelas, sampe lemari dapur dibersihin semua. Kagak jarang sampe keluar semua isinya, dicuci, dijemur, terus disusun lagi. Bau sabun, suara air, sama obrolan tetangga jadi musik sehari-hari menjelang lebaran.
Bukan cuma bersih-bersih, dapur juga mulai ngebul dari pagi. Warga pada ngaduk dodol bareng-bareng, prosesnya lama, butuh tenaga, tapi justru di situ letak serunya. Sambil ngaduk, sambil ngobrol, sambil ketawa. Selain dodol, pada bikin wajik, sagon, teng-teng, ama geplak—makanan khas yang selalu ada di meja pas lebaran. Harumnya gula merah, santan, ama kelapa parut nyampur jadi satu, bikin suasana rumah makin kerasa lebarannya. Di sela-sela itu, ibu-ibu juga pada nyanyam ketupat dari janur. Tangannya lincah, anyamannya rapih, jadi simbol kesiapan nyambut hari kemenangan.
Masuk ke hari-hari terakhir, ada yang namanya pasar penghabisan. Nah ini nih yang paling rame. Pasar penuh, orang-orang pada belanja kebutuhan terakhir—daging, santan, bumbu dapur, sampe kue-kue lebaran. Suasananya riuh, kadang desek-desekan, tapi tetep seru. Semua orang punya tujuan yang sama: nyiapin hidangan terbaik buat hari kemenangan.
Soal penampilan juga kagak ketinggalan. Baju-baju baru pada disiapin, dibeli dari pasar penghabisan—karena jaman dulu, orang Depok mah emang nunggu momen lebaran buat beli baju baru. Abis dibeli, baju itu disetrika, atau istilah orang Depok mah “nyedengin baju”. Digantung rapi, disimpen baik-baik, kagak dipake dulu sebelum hari H. Ada rasa bangga sekaligus harap yang nyelip di situ, apalagi buat anak-anak yang nunggu momen pake baju barunya pas lebaran tiba.
Yang paling khas lagi, tradisi motong kebo pake sistem andil. Warga patungan buat beli kerbau, terus disembelih bareng-bareng. Dagingnya dibagi sesuai andil masing-masing. Ini bukan cuma soal daging, tapi soal kebersamaan, gotong royong, dan rasa memiliki satu sama lain.
Dan puncaknya, pas hari lebaran tiba. Setelah sholat Id, warga pada saling maaf-maafan. Anak-anak salim ke orang tua, yang muda ke yang tua. Abis itu, ada tradisi bawa rantang ke rumah orang tua. Isinya macem-macem—opor, semur, sambel goreng, ketupat. Rantang itu bukan cuma wadah makanan, tapi simbol kasih sayang dan bakti anak ke orang tua.
Lebaran di Depok tuh sederhana, tapi dalem maknanya. Dari ngubek empang, ngaduk dodol, sampe bawa rantang, semuanya ngandung nilai kebersamaan, gotong royong, dan silaturahmi. Tradisi-tradisi ini yang bikin Depok punya warna sendiri dalam merayakan Idul Fitri.
Di tengah zaman yang makin modern, tradisi ini jadi pengingat bahwa kebahagiaan sejati itu ada di kebersamaan. Dan selama warga Depok masih ngejaga tradisi ini, Lebaran akan selalu jadi momen yang dirinduin, bukan cuma tiap tahun, tapi sepanjang hayat.
Selamat Lebaran Depok. Jaga tadisi, hidupkan budaya dalam kebahagiaan bersama!
Penulis: H. Ali Wartadinata (Ketua Pimpinan Daerah Muhammadiyah Kota Depok)
